岩岩搭火車嗰陣，坐我對面有一對母子，個細路大約六歲左右，而佢手上拎住一包用透明袋裝嘅可樂糖。
本來都無咩特別，只係個細路係咁狂食佢袋入面嘅糖，係咁食......係咁食.....係咁食。
佢阿媽見到就即刻叫停佢:「你唔好再食喇!你咳咳聲仲食咁多，一陣有痰又咳你就知味道!唔好再食呀!」
但個細路無理到，依然好享受咁食，食下又一舊，食下又一舊，仲串咀到拎咗舊糖喺佢阿媽面前搖黎搖去，再一淡一淡咁食。
佢老母見佢咁囂，即刻搶咗佢包野，個細路又即時搶返，然後好認真咁對佢老母講:「嗱!最後一舊!」
個細路食完之後，唔洗兩秒，又拎咗一舊出黎，然後話:「嗱!真係最後一舊!」
依個情況Loop咗三、四次，佢老母最後火都嚟埋，好嚴厲咁講:「最後一次，食完之後唔淮再拎嚟食!如果我見到你再拎嚟食，我就成包野掉鬼咗佢!」
之後佢老母再加多句怕個細路走數:「應承我!最後一次!OK?」
個細路諗都無諗就答應咗佢，正當佢老母好放心咁睇住佢個仔食最後一次嘅時侯.....
個細路竟然將袋入面所有嘅糖一嘢倒曬落個口到!!!!!!
之後好招積好滿足咁將空空如也嘅透明袋交比佢老母，然後話:「唔食Lu!」
個細路真係好聰明，佢老母完全吹佢唔脹，真係比個Good佢!
Search